स्पर्धेबाहेर पण लढाऊ जिद्द कायम! श्रीलंका-पाकिस्तान आमने-सामने

कालपर्यंत श्रीलंका आयसीसी महिला क्रिकेट विश्वचषक 2025 च्या उपांत्य फेरीच्या शर्यतीत होते. पण भारताने न्यूझीलंडवर मिळवलेल्या दमदार विजयाने केवळ व्हाईट फर्न्सलाच नाही, तर या विश्वचषकाच्या सह-आयोजकांनाही स्पर्धेबाहेर ढकलले. आता अजून चार साखळी सामने बाकी असले तरी उपांत्य फेरीतील चारही संघ निश्चित झाले आहेत — गतविजेते ऑस्ट्रेलिया, चार वेळचे विजेते इंग्लंड, दोन वेळा अंतिम फेरीत पोहोचलेले भारत, आणि तीन वेळा उपांत्य फेरी गाठलेले दक्षिण आफ्रिका. पहिल्यांदाच विश्वचषकाचे यजमानपद सांभाळणाऱ्या श्रीलंकेला घरच्या मैदानावर चमत्कार घडवायचा होता. पण त्यांनी स्पर्धेत फक्त एकच सामना जिंकला, तर दोन सामने पावसामुळे रद्द झाले. त्यापैकी एका सामन्यात तर, न्यूझीलंडविरुद्ध 50 षटकांत 258 धावा उभारून विजयाच्या उंबरठ्यावर असताना पावसाने त्यांच्या स्वप्नांवर अक्षरशः पाणी फेरले. श्रीलंकेच्या या निराशाजनक मोहिमेत काही सकारात्मक बाबी मात्र झळकून दिसल्या. हसिनी परेरा आणि निलाक्षिका डी सिल्वा यांनी फलंदाजीत लक्षणीय कामगिरी करत कर्णधार चमारी अटापट्टूवरील भार हलका केला. अनुभवी गोलंदाज इनोका रणवीरा, जी विश्वचषकाच्या इतिहासात एका सामन्यात चार विकेट घेणारी सर्वात वयस्कर खेळाडू ठरली, आणि उदेशिका प्रबोधनी यांनी उत्कृष्ट गोलंदाजी करत वय हा फक्त एक आकडा असल्याचं सिद्ध केलं. मात्र, दोघी करिअरच्या उत्तरार्धात असल्याने पुढील पिढी तयार आहे का, हा प्रश्न अद्याप अनुत्तरितच आहे. श्रीलंकेच्या तुलनेत पाकिस्तानचा प्रवास तर आणखी निराशाजनक ठरला. त्यांना एकही विजय मिळवता आला नाही, आणि मिळालेले दोन गुण हे पावसामुळे रद्द झालेल्या सामन्यांमुळेच. अनुभवी फलंदाज सिद्रा अमिन आणि गोलंदाजीत प्रभावी ठरलेली कर्णधार फातिमा सना यांच्याशिवाय इतर कोणतीही खेळाडू विशेष चमक दाखवू शकली नाही. आता हे दोन्ही आशियाई संघ कोलंबोमध्ये अखेरच्या सामन्यासाठी आमने-सामने येणार आहेत. कोण आपल्या मोहिमेचा शेवट विजयाने सजवेल? उत्तर मिळेल... अर्थात, पावसाने पुन्हा अडथळा आणला नाही तर!   आमने-सामने एकूण: श्रीलंका - 22, पाकिस्तान - 11 विश्वचषकात: श्रीलंका - 1,  पाकिस्तान - 1 आयसीसी एकदिवसीय क्रमवारीत: श्रीलंका - 6, पाकिस्तान - 8   सामन्याची थोडक्यात माहिती तारीख: 24 ऑक्टोबर 2025 वेळ: दुपारी 3 वाजता ठिकाण: आर प्रेमदासा स्टेडियम कोलंबो थेट प्रसारण: स्टार स्पोर्ट्स नेटवर्क, जिओहॉटस्टार