मुंबई: नव्या मेगा टर्मिनसच्या बांधणीसह विद्यमान टर्मिनसमध्ये फलाट विस्तार आणि नव्या मार्गिका उभारण्यात येत आहेत. त्यामुळे 2030 पर्यंत मध्य आणि पश्चिम रेल्वेवर नव्या 749 लोकल फेऱ्या आणि 133 नव्या मेल-एक्स्प्रेस सेवेत येणार आहेत.
मुंबईसह देशातील प्रमुख 48 शहरांमधील रेल्वे क्षमता दुप्पट करण्याची राष्ट्रीय योजना केंद्र सरकारने हाती घेतली आहे. यासाठी वापरात असलेल्या पायाभूत सुविधांमध्ये वाढ करून सन 2030 पर्यंत नव्या रेल्वेगाड्या चालवण्यात येणार आहेत. तत्काळ, अल्पकालीन आणि दीर्घकालीन अशा तीन टप्प्यांत प्रवासी वहनक्षमतेत वाढ होणार आहे.
पनवेल-कळंबोली मेगा टर्मिनससह लोकमान्य टिळक टर्मिनस-दोन, कल्याण, परळ टर्मिनस यांमुळे एकूण 22 फलाट आणि 36 मार्गिका रेल्वेगाड्या हाताळण्यासाठी उपलब्ध होणार आहेत. त्यामुळे नव्या 68 मेल-एक्स्प्रेस हाताळणे शक्य होणार आहे. यात 30 एक्स्प्रेसच्या प्राथमिक देखभालीचा समावेश आहे. सध्या मध्य रेल्वेवरील मुंबईतून 82 मेल-एक्स्प्रेस धावतात. 15 डब्यांसाठी फलाट विस्तार, कल्याण यार्डातील कामे, कल्याण-कसारा आणि कल्याण-कर्जत तिसरी-चौथी मार्गिका, पनवेल फलाट क्रमांक 4ची पुनर्बांधणी ही कामे पूर्ण झाल्यानंतर 584 नव्या लोकल फेऱ्या चालवणे शक्य होणार असल्याचे मध्य रेल्वेच्या अधिकाऱ्यांनी सांगितले.
मुंबई सेंट्रल ते डहाणू रोडदरम्यान रेल्वे मार्गिकांचे जाळे वाढवण्यात येत आहे. यासाठी विरार ते डहाणू रोड तिसरी-चौथी मार्गिका, बोरिवली ते विरार पाचवी-सहावी मार्गिका आणि मुंबई सेंट्रल ते बोरिवली पाचवी-सहावी मार्गिका, नायगाव-जूचंद्र दुहेरी मार्गिका असे एकूण 7033 कोटी रुपयांचे प्रकल्प आहेत. नव्या वर्षाच्या मध्यावधीपर्यंत तीन फलाटांचे जोगेश्वरी टर्मिनस वापरात येणार आहे. दोन फलाटांचे वसई रोड येथील नवे टर्मिनस डिसेंबर 2027 पर्यंत सुरू होणार आहे.
तत्पूर्वी, विद्यमान दादर, वांद्रे आणि मुंबई सेंट्रल टर्मिनसमध्ये नव्या चार मार्गिकांची भर पडणार आहे. परिणामी आवश्यकतेनुसार विद्यमान मेल-एक्स्प्रेसला रोज 70 डबे जोडण्याचे पश्चिम रेल्वेचे नियोजन आहे. टर्मिनस आणि रुळांचे जाळे विस्तारल्यानंतर लोकल आणि मेल-एक्स्प्रेस वाहतूक स्वतंत्र होणार असून त्यामुळे 165 नव्या लोकल सुरू करणे शक्य होणार आहे. त्याचबरोबर गोरेगाव-बोरिवली हार्बर मार्गिका कार्यान्वित होईल. वांद्रे ते अंधेरीदरम्यान 15 डबा लोकल फेऱ्या वाढवण्यात येणार आहेत.
नव्या रेल्वेगाड्या सुरू करण्यापूर्वी रेल्वे स्थानकांतील प्रवासी क्षमतेत वाढ करण्यासाठी आवश्यक तिथे डेकची उभारणी करण्यात येत आहे. सिग्नलचे अद्यवतीकरणासह गाड्यांना हाताळण्यासाठीच्या विविध सुविधांची उभारणी विभागीय स्तरावर करण्यात येत आहे, असे रेल्वे अधिकाऱ्यांनी सांगितले.
प्रतिक्रिया (Comments)
अमित भोसले
२ तासांपूर्वीमेट्रोमुळे खरोखरच वेळ वाचणार आहे. काम लवकरात लवकर पूर्ण व्हावे हीच अपेक्षा.
सीमा देशपांडे
५ तासांपूर्वीघोडबंदर रोडवरील ट्रॅफिकचा त्रास खूप वाढलाय. मेट्रो लवकरात लवकर सुरू व्हावी.