मुख्य जलवाहिनीला ४५ बेकायदेशीर नळजोडण्या

* भिवंडी महापालिका प्रशासनाची लाखांची फसवणूक * प्लंबरसह तिघांवर गुन्हा दाखल भिवंडी : पाणीपुरवठा विभागाच्या एका पथकाने सौदागर मोहल्ला परिसरात छापा टाकला आणि बेकायदेशीररित्या घेतलेल्या ४५ नळजोडण्या खंडित केल्या. शिवाय, या अनधिकृत जोडण्या बसवण्यासाठी मुख्य जलवाहिनीमध्ये फेरफार करून नागरिक आणि प्लम्बर यांनी महापालिकेचे सुमारे १.३५ लाख रुपयांचे आर्थिक नुकसान केले आहे. अशा तीन व्यक्तींविरुद्ध गुन्हा दाखल करण्यात आला आहे. भिवंडी महानगरपालिकेचा पाणीपुरवठा विभाग सध्या पाणीचोरीला आळा घालण्यासाठी कृतीशील बनला आहे. शहरातील बेकायदेशीररित्या नळजोडण्या खंडित करण्यासाठी या विभागातर्फे एक व्यापक मोहीम हाती घेण्यात आली आहे. भिवंडी महापालिकेच्या पाणीपुरवठा विभागाचे कार्यकारी अभियंता संदीप पटनावर यांच्या नेतृत्वाखाली पालिकेच्या जलवाहिन्यांचे संरक्षित करण्यासाठी आणि पाणीचोरीला आळा घालण्यासाठी सात सदस्यांचे एक विशेष पथक गठीत करण्यात आले आहे. या पथकाचे नेतृत्व करण्याची जबाबदारी लिपिक विराज भोईर यांच्यावर सोपवण्यात आली आहे. पथक भिवंडीच्या सौदागर मोहल्ला परिसरातील 'हिंदुस्तानी मशीद' ते 'जुम्मा मशीद' या दरम्यानच्या जलवाहिनीच्या पट्ट्याची पाहणी करत होते. या पाहणी दरम्यान महापालिकेच्या मुख्य जलवाहिनीला कोणत्याही अधिकृत परवानगीशिवाय अर्ध्या इंचाच्या नळजोडण्या घेतल्याचे निदर्शनास आले. परिणामी, महापालिका प्रशासनाचे १,३५,५०० रुपयांचे आर्थिक नुकसान झाले. ही बेकायदेशीर कृत्ये परिसरात सुरू असलेल्या 'आरसीसी' (काँक्रीट) रस्त्याच्या कामाच्या आडोशाने करण्यात आली होती. हा प्रकार उघडकीस आल्यानंतर, महापालिकेच्या पाणीपुरवठा विभागाने वरील सर्व बेकायदेशीर नळजोडण्या खंडित केल्या. या व्यतिरिक्त, ही जोडणी बसवण्यास जबाबदार असलेल्या तीन व्यक्तींविरुद्ध भोईवाडा पोलीस ठाण्यात गुन्हा दाखल करण्यात आला आहे. समीर मोमीन यांनी दिलेल्या माहितीनुसार महापौर नारायण चौधरी आणि महापालिका आयुक्त अनमोल सागर यांच्या निर्देशानुसार जलपुरवठा विभागाचे कार्यकारी अभियंता संदीप पाटनवार यांनी शहराभर बेकायदेशीर पाणी जोडण्यांची तपासणी करून त्या खंडित करण्याची, तसेच पाणीचोरांवर कठोर कारवाई करण्याची एक जोरदार मोहीम हाती घेण्यात आल्याचे जाहीर केले आहे. ही मोहीम अविरतपणे सुरू राहणार आहे. महापालिकेने सुरू केलेल्या या कडक कारवाईमुळे पाणीचोरीत गुंतलेल्या घटकांमध्ये एकच खळबळ उडाली आहे.