मुंबईकर जेमिमा रॉड्रिग्स, दिल्ली कॅपिटल्सची नवी आशा

वूमन्स प्रीमियर लीगच्या (WPL) पहिल्या तीन पर्वांमध्ये गुजरात जायंट्स आणि दिल्ली कॅपिटल्स हे दोन संघ जणू विरुद्ध टोकांवर उभे राहिलेले दिसले. पहिल्या दोन हंगामांत गुजरातला तळाशी समाधान मानावे लागले, तर दिल्लीने सातत्याचं उत्तम उदाहरण ठेवत तिन्ही वेळा अंतिम फेरी गाठली. पण क्रिकेटमध्ये इतिहास हा निकाल ठरवत नाही, तो फक्त संदर्भ असतो. खेळाडूंकरिता प्रत्येक सामना नवी सुरुवात असतो आणि प्रत्येक हंगाम जुन्या कथा बदलण्याची संधी देतो. पुन्हा एकदा आमने-सामने येताना भूतकाळापेक्षा सध्याची मानसिकता आणि तयारी अधिक महत्त्वाची ठरणार आहे. WPL 2026मध्ये दिल्ली कॅपिटल्स नव्या नेतृत्वाखाली मैदानात उतरत आहे. मेग लॅनिंगनंतर कर्णधारपदाची धुरा जेमिमा रोड्रिग्सकडे आली आहे. लॅनिंगसारख्या यशस्वी आंतरराष्ट्रीय कर्णधाराची जागा भरणं जेमिमासाठी सोपं नव्हतं, पण या 25 वर्षीय मुंबईकराने आतापर्यंत संयम, आत्मविश्वास आणि परिपक्वतेची ठोस झलक दाखवली आहे. देशांतर्गत क्रिकेटमध्ये मुंबईचं नेतृत्व केल्याचा अनुभव तिच्या कामी येतोय. दिल्लीची ताकद फक्त कर्णधारापुरती मर्यादित नाही. शफाली वर्मा, स्नेह राणा आणि श्री चरणी या तीन विश्वचषक विजेत्या खेळाडू संघात असून त्या एकहाती सामना फिरवू शकतात. त्यामुळे संघाला खोलपणा, संतुलन आणि मोठ्या सामन्यांचा अनुभव मिळतो. दिल्ली-गुजरात लढतीतील सर्वात रंगतदार संघर्ष पॉवरप्लेमध्ये पाहायला मिळू शकतो. शफाली वर्माची आक्रमक फलंदाजी आणि रेणुका सिंग ठाकूरची अचूक स्विंग गोलंदाजी यांच्यातील सामना प्रेक्षकांना खिळवून ठेवणारा ठरेल. टी-20 क्रिकेटमध्ये पॉवरप्ले सामन्याची दिशा ठरवतो आणि इथे बाजी मारणारी खेळाडू निकालावर मोठा प्रभाव टाकू शकते. या सामन्यात दोन्ही संघांकडे जागतिक दर्जाच्या अष्टपैलू खेळाडूंचीही ताकद आहे. दिल्लीकडे भरोसेमंद खेळाडू मारिझान काप आहे, तर गुजरातकडून कर्णधार ऍश्ले गार्डनरकडून नेतृत्वासह दमदार कामगिरीची अपेक्षा असेल. WPL 2026मधील दुसरा सामना खेळताना दोन्ही संघांसाठी सुरुवातीलाच गुणतालिकेत आघाडी मिळवणं महत्त्वाचं ठरणार आहे. दिल्लीसाठी नव्या नेतृत्वाखाली सातत्य कायम ठेवण्याचं आव्हान आहे, तर गुजरातसाठी ही स्वतःची प्रतिमा बदलण्याची आणि पुनरागमनाची संधी आहे. जेव्हा वेगवेगळ्या प्रवासांची टक्कर होते, तेव्हा सामना नेहमीच रंगतदार होतो आणि ही लढतही तशीच असणार आहे. आमने-सामने (मागील 5 सामने) दिल्ली कॅपिटल्स – 3 | गुजरात जायंट्स – 2 सामन्याची माहिती दिनांक: 11 जानेवारी 2026 वेळ: संध्याकाळी 7:30 स्थळ: डॉ. डी वाय पाटील क्रीडा संकुल, नवी मुंबई थेट प्रक्षेपण: स्टार स्पोर्ट्स नेटवर्क, जिओहॉटस्टार