रविवारी रंगणार भारत वि. पाकिस्तान सामना

आयसीसी महिला क्रिकेट विश्वचषकाच्या 13व्या आवृत्तीतील सहावा सामना रविवारी कोलंबो येथील आर. प्रेमदासा स्टेडियमवर, कट्टर प्रतिस्पर्धी भारत आणि पाकिस्तान यांच्यात खेळवला जाईल. जागतिक क्रमवारीत तिसऱ्या स्थानी असलेल्या भारतीय संघाने श्रीलंकेवर 59 धावांनी विजय मिळवत स्पर्धेची विजयी सुरुवात केली. तर दुसरीकडे, पाकिस्तानला बांगलादेशविरुद्ध केवळ 129 धावांत गुंडाळल्या गेल्यानंतर सात गडी राखून पराभव पत्करावा लागला. भारत आणि पाकिस्तान यांच्यात रोमहर्षक लढत होईल, अशी अपेक्षा आहे. मात्र, कोलंबो येथे काल श्रीलंका आणि ऑस्ट्रेलियामधील सामना पावसामुळे रद्द झाल्याने, आज वरुणदेव कृपादृष्टी ठेवेल आणि भारत-पाकिस्तान सामना निर्विघ्न पार पडेल, अशी प्रार्थना क्रिकेटप्रेमी करतील. आमने-सामने भारत आणि पाकिस्तान यांनी एकमेकांविरुद्ध एकूण 11 एकदिवसीय सामने खेळले आहेत. त्यापैकी पाकिस्तानला एकही विजय मिळवता आलेला नाही, तर भारताने सर्वच सामने जिंकले आहेत. विश्वचषक सामन्यांमध्ये भारत 4-0 ने आघाडीवर आहे.  संघ भारत: हरमनप्रीत कौर (कर्णधार), स्मृती मानधना (उपकर्णधार), प्रतिका रावल, हरलीन देओल, जेमिमा रॉड्रिग्स, ऋचा घोष (यष्टीरक्षक), उमा छेत्री (यष्टीरक्षक), रेनुका सिंह ठाकूर, दीप्ती शर्मा, स्नेह राणा, श्री चरणी, राधा यादव, अमनजोत कौर, अरुंधती रेड्डी, क्रांती गौड पाकिस्तान: फातिमा सना (कर्णधार), मुनीबा अली सिद्दीकी (उपकर्णधार, यष्टीरक्षक), आलिया रियाज, डायना बैग, ऐमन फातिमा, नाश्रा संधू, नतालिया परवेज, ओमैमा सोहेल, रमीण शमीम, सादफ शामास, सादिया इक्बाल, शवाल झुल्फिकार, सिद्रा अमीन, सिद्रा नवाझ, सयदा अरुब शाह   कोणत्या खेळाडूंवर लक्ष असेल दीप्ती शर्मा: या भारतीय अष्टपैलू खेळाडूने श्रीलंकेविरुद्धच्या मागील सामन्यात फलंदाजीत आणि गोलंदाजीत उत्कृष्ट कामगिरी करून सामनावीराचा पुरस्कार जिंकला. तिने 53 चेंडूत 53 धावा केल्या आणि नंतर 10 षटकांत (ज्यात एक निर्धाव षटकाचा समावेश होता), 54 धावा देऊन तीन विकेट्स घेतल्या. स्मृती मानधना: या वर्षी एकदिवसीय क्रिकेटमध्ये 900 पेक्षा अधिक धावा करणाऱ्या भारतीय उपकर्णधाराला श्रीलंकेविरुद्धच्या सामन्यात फक्त आठ धावांवर बाद व्हावे लागले. मात्र, भारताला या डावखुऱ्या सलामीवीरकडून पुढील सामन्यांत दमदार सुरुवात अपेक्षित आहे. फातिमा सना: पाकिस्तानची कर्णधार बांगलादेशविरुद्धच्या पराभवात एकमेव उजळ ठिपका ठरली. तिने 33 चेंडूंमध्ये 22 धावा (तीन चौकारांसह) केल्या आणि गोलंदाजीत एक विकेट मिळवली. सिद्रा अमीन: पाकिस्तानच्या या संघातील सर्वाधिक एकदिवसीय धावा करणारी ही फलंदाज बांगलादेशविरुद्ध पहिल्याच चेंडूवर बाद झाली. मात्र, या वरच्या फळीतील फलंदाजाकडून उर्वरित सामन्यांत तिचा संघ आणि समर्थक महत्वपूर्ण भूमिका बजावण्याची अपेक्षा करतील.   सामन्याची थोडक्यात माहिती  दिनांक: 5 ऑक्टोबर, 2025 वेळ: दुपारी 3:00 वाजता ठिकाण: आर. प्रेमदासा स्टेडियम, कोलंबो थेट प्रक्षेपण: स्टार स्पोर्ट्स नेटवर्क, डिस्नी+ हॉटस्टार