कडोंमपा आयुक्त डॉ. इंदुराणी जाखड पालघरच्या जिल्हाधिकारी

कल्याण : कल्याण-डोंबिवली महानगरपालिकेच्या आयुक्त डॉ. इंदुराणी जाखड यांची पालघर जिल्हाधिकारी (कलेक्टर) म्हणून बदली करण्यात आली आहे. राज्य सरकारच्या प्रशासनात झालेल्या बदलांनुसार त्यांची ही नियुक्ती जाहीर करण्यात आली आहे. डॉ. इंदुराणी जाखड यांनी कल्याण-डोंबिवली महानगरपालिकेत कार्यरत असताना अनेक महत्त्वाचे निर्णय घेतले आणि शहरी विकासास गती दिली. त्यांच्या कार्यकाळात महापालिकेच्या विविध प्रकल्पांना चालना मिळाली आणि नागरी सेवांमध्ये सुधारणा करण्यात आली. पालघर जिल्हा हा आदिवासीबहुल आणि वेगवेगळ्या सामाजिक-आर्थिक आव्हानांनी भरलेला आहे. या पार्श्वभूमीवर, डॉ. इंदुराणी यांच्यासारख्या अनुभवी अधिकाऱ्यांची नियुक्ती जिल्ह्याच्या विकासासाठी महत्त्वाची मानली जात आहे. त्यांनी यापूर्वी विविध शासकीय पदांवर काम करताना प्रशासनात उल्लेखनीय कामगिरी बजावली आहे. राज्य सरकारने केलेल्या या बदलांमुळे कल्याण-डोंबिवली महानगरपालिकेचा कार्यभार सद्यस्थितीत अतिरिक्त आयुक्त हर्षल गायकवाड यांच्याकडे देण्यात आला आहे. दरम्यान, पालघर जिल्ह्याच्या नव्या जिल्हाधिकाऱ्यांच्या नेतृत्वाखाली तेथील विकासकामांना वेग मिळण्याची अपेक्षा व्यक्त केली जात आहे. राज्यात गेल्या काही दिवसांपासून वरिष्ठ आयएएस अधिकाऱ्यांच्या बदल्यांचा सिलसिला सुरूच आहे. त्यामध्ये आता डॉ. इंदुराणी जाखड यांच्या बदलीचे आदेश निघाले आहेत. पालघरचे जिल्हाधिकारी गोविंद बोडके यांच्या निवृत्तीनंतर त्यांची वर्णी लागली आहे. इंदुराणी जाखड या २०१६च्या बॅचच्या आयएएस अधिकारी असून यूपीएससीच्या दुसऱ्याच प्रयत्नात त्यांनी देशात ३० वा क्रमांक पटकावला. जाखड या मूळच्या हरियाणातील झज्जरमधील आहेत. पण नंतर त्यांचा परिवार हा दिल्लीमध्ये स्थायिक झाला. त्यांचे वडील हे दिल्ली पोलिसमध्ये होते.