मीरा-भाईंदरमध्ये २१ वर्षांनी अनधिकृत बांधकामांचे सर्वेक्षण

अवघी १८३ बांधकामे अनधिकृत भाईंदर : मीरा-भाईंदर महापालिका हद्दीत एकूण १८३ बांधकामे ही अनधिकृत आहेत. प्रशासनाने केलेल्या प्रभागनिहाय सर्वेक्षणातून ही माहिती समोर आली आहे. त्यामुळे अशा बांधकामांची यादी महापालिकेने २१ वर्षांनी पहिल्यांदाच संकेतस्थळावर प्रसिद्ध केली असून नागरिकांना यापासून सावध राहण्याचे आवाहन केले आहे. मीरा-भाईंदर हे झपाट्याने वाढणारे शहर आहे. त्यामुळे दिवसेंदिवस येथील घरांचे, दुकानांचे आणि जागेचे दर हे वाढत आहेत. याशिवाय वाढत्या लोकसंख्येमुळे शहरातील सुख-सुविधांमध्येदेखील भर पडू लागली आहे. याच गोष्टीचा गैरफायदा उचलत काही विकासक तसेच भूमाफिया शहरात अनधिकृत बांधकाम करत आहेत. अशा बांधकामामुळे शहर विकासात बाधा निर्माण होत असून गरीब नागरिकांची देखील आर्थिक फसवणूक होत आहे. शहरातील अनधिकृत बांधकामे रोखण्यासाठी महापालिकेच्या स्थापनेपासूनच अतिक्रमण विभागाची स्थापना करण्यात आली आहे. याशिवाय प्रभाग अधिकाऱ्यांना आपल्या प्रभागात कारवाईचे स्वतंत्र आदेश देण्यात आले आहे. मात्र मागील काही वर्षांत प्रशासकीय अधिकाऱ्यांकडून आपल्या कामाकडे दुर्लक्ष केले जात असल्यामुळे शहरात अनधिकृत बांधकामांची संख्या वाढली आहे. त्यामुळे अशा अस्तित्वात असलेल्या बांधकामामुळे सामान्य नागरिकांची फसवणूक होऊ नये म्हणून यांची यादी महापालिकेमार्फत प्रसिद्ध करण्याचे शासन आदेश आहेत. मागील २१ वर्षांत प्रशासनाने ही यादी जाहीर करण्याकडे कानाडोळा केला होता. परंतु पालिका आयुक्तपदी संजय काटकर यांनी पदभार स्वीकारल्यानंतर प्रथमच पालिकेच्या संकेतस्थळावर ही यादी प्रसिद्ध करण्यात आली आहे. त्यानुसार शहरात सद्यस्थितीत सहा प्रभागांत एकूण १८३ बांधकामे असल्याचे स्पष्ट झाले आहे. अनधिकृत बांधकामांवर दंडात्मक कारवाई मीरा-भाईंदर शहरातील अनधिकृत बांधकामांवर महापालिकेमार्फत कारवाई केली जाते. यासाठी प्रशासनाचे मनुष्यबळ आणि सामुग्री खर्ची करावी लागते. त्यामुळे हा भुर्दंड अनधिकृत बांधकाम करणाऱ्यांकडूनच वसूल करावा, असा शासकीय ठराव करण्यात आला आहे. त्यानुसार यापुढे हा दंड वसूल केला जाणार असल्याची माहिती आयुक्त संजय काटकर यांनी दिली. अनधिकृत बांधकामाची प्रभागनिहाय यादी प्रभाग क्रमांक १ – ६ प्रभाग क्रमांक २ – १ प्रभाग क्रमांक ३ – ७८ प्रभाग क्रमांक ४ – ३२ प्रभाग क्रमांक ५ – ०८ प्रभाग क्रमांक ६- ५८