३५ पदकांसह ठाणे बॅडमिंटन अकॅडमीचे स्पर्धेवर वर्चस्व

यश ढेंबरे, तन्वी घारपुरे व तनय जोशी यांना दुहेरी मुकुट ठाणे: ठाणे शहर व जिल्हा बॅडमिंटन असोसिएशनच्या वतीने आयोजित करण्यात आलेली ३८ वी सीएट पुरस्कृत यॉनेक्स-सनराईज ठाणे जिल्हा ज्युनिअर बॅडमिंटन अजिंक्यपद स्पर्धा नुकतीच २८ ते ३१ जुलै २०२५ या कालावधीत दादोजी कोंडदेव स्टेडियममधील खंडू रांगणेकर बॅडमिंटन हॉल येथे मोठ्या उत्साहात झाली. जिल्ह्यातील सर्व तालुक्यांतून, उपनगरांतील विविध भागांतून तसेच नवख्या पण अत्यंत गुणी खेळाडूंनी या भव्य स्पर्धेत सहभाग घेत १००० हून अधिक प्रवेशिका नोंदवल्या, ही संख्या बॅडमिंटन खेळाची वाढती लोकप्रियता दर्शवणारी ठरली. या भव्य स्पर्धेच्या पारितोषिक वितरण समारंभाला ज्येष्ठ सामाजिक कार्यकर्ते चंद्रशेखर पुरोहित आणि माजी खासदार तथा नामवंत पत्रकार कुमार केतकर प्रमुख पाहुणे म्हणून उपस्थित होते. या स्पर्धेत ठाणे बॅडमिंटन अकॅडमीच्या खेळाडूंनी २० वेगवेगळ्या प्रकारांमध्ये एकूण ३५ पदके जिंकून जबरदस्त वर्चस्व गाजवले. वेगवेगळ्या वयोगटांतील चुरशीच्या लढतींमध्ये ठाणेच्या चॅम्पियन्सनी आपली झलक दाखवत सुवर्ण, रौप्य व कांस्य अशा तिन्ही रंगांतील पदके पटकावली. स्पर्धेच्या अतिशय यशस्वी आयोजनासाठी सर्वत्रून ठाणे शहर व जिल्हा बॅडमिंटन असोसिएशनचे अध्यक्ष श्रीकांत वाड, स्पर्धा सचिव मयूर घाटणेकर आणि संपूर्ण संघाचे विशेष कौतुक केले जात आहे. अंतर्गत नऊ वर्षे वयोगटात मुलांच्या एकेरीत दमदार खेळ करत सामन्य मानेने सुवर्ण पदक पटकावले तर पर्ण वाणी उपविजेता ठरला. ११ वर्षांखालील मुलांच्या गटात सौरभ दरजी, १३ वर्षांखालील गटात दुसऱ्या मानांकित अर्हम भांडारी, १५ वर्षांखालील गटात टॉप सीड आदित्य पडवाल, १७ वर्षांखालील मुलांच्या गटात, दुसऱ्या मानांकित यश धेंबारे, मुलींच्या नऊ वर्षांखालील गटात निष्का शहा हिने अंतिम फेरीत विजय मिळवत सुवर्ण पदक मिळवले. ११ वर्षांखालील मुलींच्या गटात टॉप सीड शनाया तवातेने विजेतेपद पटकावले. १३ वर्षांखालील गटात टॉप सीड आराध्या मोहितेने विजेतेपद पटकावले. १५ वर्षांखालील मुलींच्या गटात टॉप सीड सनाया ठक्कर, १७ वर्षांखालील गटात, टॉप सीड तन्वी घारपुरे, १७ वर्षांखालील मिश्र दुहेरीत, टॉप सीड तनय जोशी व मानसवी चौहान, ११ वर्षांखालील मुलांच्या दुहेरीत, लिशान त्रिपाठी व सौरभ दरजी, १३ वर्षांखालील गटात, टॉप सीड अल्फी मेक्कादथ व यज्ञश वरघडे, १५ वर्षांखालील गटात, टॉप सीड आदित्य पडवाल व मयंक राजपूत, १७ वर्षांखालील मुलांच्या दुहेरीत, टॉप सीड तनय जोशी व यश धेंबारे, १३ वर्षांखालील मुलींच्या दुहेरीत, आर्या शिंदे व प्रांजल पाटील, १५ वर्षांखालील मुलींच्या गटात, टॉप सीड अंजना नायर व अश्विका नायर, १७ वर्षांखालील मुलींच्या दुहेरीत, टॉप सीड ईरा कुलकर्णी व तन्वी घारपुरे यांनी विजेतेपद पटकावले.