बुलेट ट्रेनचा भूमिगत मार्ग अंतिम टप्प्याकडे!

अत्याधुनिक तंत्रज्ञानाने पाच किमी खोदकाम पूर्ण ठाणे: भारताच्या महत्त्वाकांक्षी बुलेट ट्रेन प्रकल्पातील २१ किलोमीटर लांबीच्या बोगद्याच्या बांधकामाला वेग आला असून, हा भूमिगत मार्ग आता अंतिम टप्प्याकडे वाटचाल करत आहे. बीकेसी (मुंबई) ते शिळफाटा या मार्गावरील या बोगद्यामध्ये अत्याधुनिक तंत्रज्ञानाचा वापर करून काम सुरू आहे. या बोगद्यापैकी पाच किलोमीटर भाग न्यू ऑस्ट्रियन टनेलिंग मेथड (एनएटीएम) पद्धतीने यशस्वीपणे खोदून पूर्ण करण्यात आला आहे. घनसोली ते शिळफाटा दरम्यानचा हा एनएटीएम टप्पा विशेषतः तांत्रिकदृष्ट्या आव्हानात्मक मानला जात होता. सध्या बोगद्याच्या आतील बांधकामाच्या पुढील टप्प्यांवर काम सुरू असून, ड्रेनेज सिस्टीम बसवण्याचे काम वेगाने सुरू आहे. ड्रेनेज कास्टिंग गॅन्ट्रीच्या साहाय्याने झिरपणारे पाणी सुरक्षितरीत्या गोळा करून स्वतंत्र यंत्रणेद्वारेबाहेर सोडले जात आहे. त्यानंतर वॉटरप्रूफिंग गॅन्ट्रीच्या मदतीने विशेष मेम्ब्रेन बसवण्यात येत असून, त्यामुळे बोगद्यात पाणी शिरू नये यासाठी मजबूत संरक्षण तयार होत आहे. याचबरोबर, बोगद्याच्या आतील भागात स्टीलच्या सळ्यांचे जाळे बसवण्याचे कामही सुरू आहे, ज्यामुळे अंतिम काँक्रीट संरचनेला अधिक मजबुती मिळणार आहे. अंतिम टप्प्यात लायनिंग गॅन्ट्रीच्या सहाय्याने काँक्रीटचा थर टाकण्यात येणार असून, त्यामुळे बोगद्याला कायमस्वरूपी मजबुती आणि गुळगुळीत फिनिश मिळणार आहे. याशिवाय, ऑपरेशन आणि मेंटेनन्ससाठी आवश्यक असलेल्या यंत्रणेसाठी विशेष उपकरण कक्षही तयार केले जात आहेत. प्रत्येक टप्पा नियोजनबद्ध पद्धतीने पूर्ण होत असल्याने, भारताच्या पहिल्या बुलेट ट्रेन प्रकल्पाचा हा महत्त्वाचा भूमिगत भाग आता लवकरच पूर्णत्वाच्या उंबरठ्यावर येणार असल्याचे स्पष्ट होत आहे.